Basarvikuskifti á vári

Vit vóru nógv fólk í Putlhúsi hetta vikuskiftið, Kristina hevur glett seg til basar síðan seinasta basar. Basarurin var fríggjakvøld og leygarkvøld, og Kristina livdi seg ordiliga inn í spenningin.  

Í  Dali er nógv arbeiði um várið, bloggurin heilsaði upp á Óla í bønum. Hann ger eina moldveltu á stað, har tey hava havt flagveltu fyrr.

Eisini Eisenberg og Lovisa seta epli niður, í Klæminstovugarðinum eru nú tvær flagveltur. Langomma Eisenberg búði í Túni í Dali og giftist til Skarvanesar.  Eisenberg er oldurabbasonur hin navnframa Enok á Skarvanesi.

Í Rennuni er altíð ein kaffimunnur at fáa. Sunnvør var úti og arbeiddi í garðinum.

Í góðveðrinum í dag vóru Herbert og Oddvaldur ein langan súkklutúr, teir súkklaðu úr Dali til Skopunar.

Magna teknaði ein venjibreyt í skúlatúninum.

Páskir 2021

 

Lítillátin krossur við onngari peru og ongum liti

Nú ið báturin siglir allan dagin er nógv koming og faring alla tíðina. Frida og Louis vóru tvær nætur, og Turið kemur væntandi í dag, páskadag. Hugsi um, hvussu ferðslan verður, tá ið landfast verður. Tá verður ikki neyðugt at koyra til Skopunar við fólki og eftir fólki. Men tá verða kanska ongantíð liggjandi gestir heldur.

Tá ið vit komu til Dals, sóu vit, at tey vóru farin at byggja uppi í bønum. Vit hugsaðu, at nú byrjar summarhúsøldin í Dali, men tey siga mær, at tað er eitt vatnreinsiverk.

Páskagestur í frískum vindi

Frida og børnini og Turið systir fóru ein hagatúr til Skarvanesar av húsvíksvegnum og síðani til Dals, langafríggjadag. Ein góður túrur, men tær lata heilsa rætta viðkomandi, at stik eru á vegnum, og tað er óheppið at lýsa við einum túri, sum fær fólk at klíva og hegla stik niður. 

Nógv fólk í Dali um páskirnar. Í Putlhúsi eru 4 børn. Tey hava spælt stikkbólt í skúlatúninum, ein slík rúgva av fólki - og ikki bara børn. 

Vit vóru á loppumarknað í Skálavík og síðani sjálvandi ein túr á Malarkaffihúsið

Leygardagin bleiv boðað til innispæl í Eiriksgarði, hvussu heppin kann ein vera? Tey ungu vaksnu spældi við, og fleiri av okkum eldru sótu og hugdu, tað var ein fragd at síggja.

Fløkimamma

Brú, brú, brilla

Og eitt, sum líkist tí, vit kallaðu "Hús í nátt", ein stólur ov lítið, so tá ið øll reisa seg, verður ein við sviðið soð. Jónleif og Helga skipaðu fyrimyndarliga fyri.

Banka kjøt

Nógv fólk var í kirkju langa fríggjadag og páskadag. Og børnini ótu sjokulátu og rullaðu egg. So herligt!

Jólini tikin niður

 Langt um leingi gjørdi eg ein túr til Dals, ein stuttan hesa ferð. Ørindini vóru at taka jólini niður, nú er føstan byrjað, so nú munna jólini vera úti.

Tað var oysandi regn í gjárkvøldið, men í dag var heilt várligt, lýtt og ljóst.

Vitjaði á Bakka, Turið var farin til Havnar, men fekk heilsað upp á  Vitus.

Hitti eisini Sannulenu, sum stakk inn á gólvið í Putlhúsi. Annars var fátt fólk á ferð.

Vitjaði á verkstaðnum hjá Bødvar. Har eru ikki færri enn tveir lærlingar í løtuni. Tey arbeiddu við eini  ovurstórari sag. 

Stjórin sat sum vera man á skrivstovuni, eitt hugnaligt prát mitt í arbeiðstíðini. Bødvar er so vitandi og víðskygdur maður og dugir væl at práta við fólk. 

Bødvard greiddi frá øðrum spennandi kreativum verkevnum, sum hann er í holt við

Tað runda sum tú sært er ein partur av einum rundum hjalli, taå ER originalt.

Men jólaperurnar í stovuvindeyganum eru nú í hvussu er pakkaðar niður til næstu jól.

Helga og Bødvar - 25 ár

 Aldarinnar brúdleyp! 

Tað var millum jóla og nýggjárs í 2017, at vit fingu at vita, at 8. august í 2020 skuldi vera ball í Eiriksgarði. Stóran kross í kalendaran.  Og fyrireikingarnar hava verið í gongd síðani. Silvurbrúdleypið var eitt vælkomst brúdleyp, og 400 fólk boðaðu frá komu síni. Bødvar smíðaði og manereraði, so at øll 400 skuldu fáa sess. Eitt stórt tjald sett upp á einum nýsmíðaðum útigólvi.

So byrjaðu avboðini at koma, ikki bara gestir, men kokkar og tónleikarar eisini. Eg hugsi, at øll hugsaðu nei, nei! hetta hava Hekga og Bødvar ikki uppiborið. Men tey sum kenna Bødvar vita, at tá ið hann hevur sagt 8. aug., so er tað 8. aug., og júst hesi bæði eru tey røttu til at taka slíkt við einum smíli, veitslan bleiv barberað og trimmað, og tey umleið 60, sum settust við búgvið borð í gjárkvøldið fingu eitt rimmarkvøld.

Silvurbrúðarparið tók ímóti á pallinum, og snapsurin var koronatryggur.

Bødvar fekk eina serliga gávu frá Johild, men so løgið tað ljóðar, tveitti hann ljósastakan í rusk. Men tað hevði sjálvandi sína søgu.

GESTIRNIR KOMA

Vælkomudrykkurin, sum børnini skipaðu fyri, var havdur við kápiltrummuborðini, sum hegnisbrúðgómurin hevur kreerað. Tað var ikki sól, men tað var heldur ikki regn, so...

Tá ið tað nú skuldi vera so, so var tað gott, at í Dali eru tey væl stødd við tónleikarar og sangarar. Fimm tónleikarar, og sangurin rungaði.  Tað er ongastaðni, at fólk eru so sanghugað sum í Dali, vit sita í tímavís og syngja. At  stórhúsmenninir hava konditión til tað! Vit vóru heppin at vera vitni til debutin hjá Jónasi, sum veitslumusikari í Dali.

Summar í Dali 2020

Í botninum eru teir komnir í rætt, og kaffipausa er. Tað er ælaveður, men arbeiðið gongur væl við skemt og tos. 

Í Malthúsi gongur tað fyri seg! Hin altíð fúsa og arbeiðsama Johild fær tingini at henda. Eplaveltu í besta blóma. Nýggja úthurð og so dramtisk svørt hús. Flott við teirri hvítu kirkjuni í baksýni.

Bergur og gentan hjá honum Aran vóru í Putlhúsi tveir dagar. Tað eru nógv ár síðani, Bergur spældi í Dalstúni.

Altíð hugaligt at ganga gjøgnum bygdina ein góðan dag.